నోటి క్యాన్సర్తో బాధపడుతున్న రోగులకు ఇది నిజంగా శుభవార్త. ప్రస్తుతం ఈ క్యాన్సర్ చికిత్సలో కీమోథెరపీని ప్రధానంగా ఉపయోగిస్తున్నారు. అయితే, దీనివల్ల క్యాన్సర్ కణాలతో పాటు ఆరోగ్యకరమైన కణాలు కూడా దెబ్బతింటున్నాయి. భవిష్యత్తులో క్యాన్సర్ మళ్లీ తిరగబెట్టే ప్రమాదం కూడా ఉంటోంది. ఈ సమస్యకు చెక్ పెడుతూ, బెంగళూరులోని 'ఇండియన్ ఇన్స్టిట్యూట్ ఆఫ్ సైన్స్ (IISc)' పరిశోధకులు అల్ట్రాసౌండ్ ఆధారిత సరికొత్త చికిత్సా విధానాన్ని అభివృద్ధి చేశారు. ఇది భవిష్యత్తులో క్యాన్సర్ వైద్యంలో విప్లవాత్మక మార్పులు తీసుకురానుందని నిపుణులు భావిస్తున్నారు.
ఆరోగ్యకరమైన కణాలకు సురక్షితం..
ఐఐఎస్సీ శాస్త్రవేత్తలు తక్కువ-ఫ్రీక్వెన్సీ ఉన్న అల్ట్రాసౌండ్ తరంగాలను ఉపయోగించి ఈ వినూత్న విధానాన్ని విజయ వంతంగా పరీక్షించారు. ఈ చికిత్స ద్వారా కేవలం నోటి క్యాన్సర్ కణాలను మాత్రమే ఎంపిక చేసి నాశనం చేయవచ్చు. దీనివల్ల చుట్టుపక్కల ఉండే ఆరోగ్యకరమైన కణాలకు ఎలాంటి హాని కలగదు. భవిష్యత్తులో క్యాన్సర్ చికిత్స మరింత సురక్షితంగా, కచ్చితత్వంతో పనిచేయడానికి ఈ పరిశోధన బాటలు వేయనుంది.
ఎలా పనిచేస్తుందంటే..?
సాధారణంగా మన శరీర కణాలు యాంత్రిక ఒత్తిడిని తట్టుకోవడానికి "ట్రోపోమయోసిన్ 2.1" (Tropomyosin 2.1) అనే ప్రోటీన్ ఉపయోగపడుతుంది. నోటి క్యాన్సర్ కణాల్లో ఈ ప్రోటీన్ స్థాయిలు చాలా తక్కువగా ఉన్నట్లు పరిశోధకులు గుర్తించారు. దీనివల్ల ఆ కణాలు యాంత్రికంగా చాలా బలహీనంగా ఉంటాయి. ఆ బలహీనతను ఆసరాగా చేసుకుని, అల్ట్రాసౌండ్ ద్వారా తేలికపాటి యాంత్రిక ఒత్తిడిని కలిగించినప్పుడు క్యాన్సర్ కణాలు ఆ ప్రేరణను తట్టుకోలేక విచ్ఛిన్నం కావడం ప్రారంభించాయి. అదే సమయంలో, ఈ ప్రోటీన్ పుష్కలంగా ఉండే ఆరోగ్యకరమైన కణాలపై అల్ట్రాసౌండ్ ప్రభావం నామమాత్రంగానే ఉన్నట్లు తేలింది.
రక్షణ కవచాన్ని ఛేదించి..
ఐఐఎస్సీ పరిశోధకులు, ఎంఎస్ రామయ్య మెడికల్ కాలేజ్ అండ్ హాస్పిటల్ వైద్య బృందంతో కలిసి సంయుక్తంగా ఈ అధ్యయనాన్ని నిర్వహించారు. సాధారణంగా క్యాన్సర్ కణితుల చుట్టూ ఒక రక్షణ కవచం ఏర్పడి ఉంటుంది. ఇది అత్యంత ప్రమాదకరమైనది, ఎందుకంటే మందులను, శరీర రోగనిరోధక కణాలను క్యాన్సర్ కణాల దరికి ఇది చేరనివ్వదు. అయితే, ఈ కొత్త అల్ట్రాసౌండ్ విధానం క్యాన్సర్ కణాలను చంపడమే కాకుండా, కణితి చుట్టూ ఉన్న ఈ మొండి కవచాన్ని కూడా బలహీనపరుస్తుందని పరిశోధకులు వెల్లడించారు.
కొత్త ఆశలు..
మెకానికల్ స్టిమ్యులేషన్ ఆధారంగా వ్యాధిగ్రస్త కణాల బలహీనతను నేరుగా లక్ష్యంగా చేసుకునే ఈ విధానం వైద్యరంగంలో ఓ కొత్త ఆశను చిగురింపజేస్తోంది. ఈ కీలక పరిశోధనా వివరాలు ప్రతిష్టాత్మక 'మెటీరియల్స్ టుడే బయో' జర్నల్లో ప్రచురితమయ్యాయి.