భారతీయ వంటగదిలో పసుపు లేని రోజంటూ ఉండదు. ఇది కేవలం కూరలకు రంగు, రుచిని ఇచ్చే మసాలా దినుసు మాత్రమే కాదు.. రోగనిరోధక శక్తిని పెంచే అద్భుతమైన ఔషధం. అయితే, మార్కెట్లో లభించే పసుపు పొడిలో లాభాల కోసం కృత్రిమ రంగులు, సుద్దపొడి, స్టార్చ్ వంటి చౌకబారు పదార్థాలను విచ్చలవిడిగా కలుపుతున్నారు. ఈ కల్తీ పసుపును దీర్ఘకాలం పాటు వాడటం వల్ల ఆరోగ్యం మెరుగుపడటానికి బదులు, శరీరానికి తీవ్రమైన హాని జరుగుతుంది. మరి మనం వాడుతున్న పసుపు స్వచ్ఛమైనదేనా కాదా అని తెలుసుకోవడం ఎలా..? ఎటువంటి ఖరీదైన పరికరాలు లేకుండా, ఇంట్లోనే సులభంగా ఐదు నిమిషాల్లో పసిగట్టే 5 చిట్కాలను గురించి తెలుసుకుందామా..?
స్వచ్ఛతను పరీక్షించే 5 సులభమైన మార్గాలు..
1. నీటి పరీక్ష (Water Test)ఒక గాజు గ్లాసులో గోరువెచ్చని లేదా సాధారణ నీటిని తీసుకోండి. అందులో ఒక చెంచా పసుపు పొడిని వేసి, అసలు కలపకుండా అలాగే కొన్ని నిమిషాల పాటు వదిలేయండి. పసుపు నెమ్మదిగా గ్లాసు అడుగుభాగానికి చేరుకుని, పైనున్న నీరు స్వచ్ఛంగా కనిపిస్తే అది అసలైన పసుపు. అలా కాకుండా నీరు వెంటనే ముదురు పసుపు రంగులోకి మారిపోయినా, లేదా రంగు వేగంగా వ్యాపించినా అందులో కృత్రిమ రంగులు ఉన్నాయని అర్థం.
2. అరచేతితో రుద్ది చూడండి..
కొద్దిగా పసుపు పొడిని తీసుకుని మీ అరచేతిపై వేసి, మరో చేతి బొటనవేలితో కాసేపు గట్టిగా రుద్దండి. స్వచ్ఛమైన పసుపు అయితే చర్మానికి లేత పసుపు రంగు అంటుకుంటుంది, అది నీటితో కడిగితే సులభంగా పోతుంది. ఒకవేళ రంగు చాలా ముదురుగా, కెమికల్ లాగా అనిపించినా, చేతులు కడిగినా రంగు వదలకపోయినా అది కల్తీదే.
3. వెనిగర్ చిట్కాఒక చిన్న గిన్నెలో చెంచా పసుపును తీసుకుని, దానికి కొన్ని చుక్కల వెనిగర్ (Vinegar) కలపండి. ఈ మిశ్రమం నుండి అసాధారణంగా నురుగు రావడం లేదా రంగులో హఠాత్తుగా మార్పు కనిపిస్తే, అందులో సుద్దపొడి లేదా ఇతర రసాయనాలు కలిపినట్లు అనుమానించవచ్చు.
4. తెల్లటి గుడ్డపై పరీక్షఒక తెల్లటి కాటన్ గుడ్డపై కొద్దిగా పసుపు పొడిని వేసి, కొన్ని చుక్కల నీరు కలపండి. ఆ మరకను గమనించండి. రసాయన రంగులు కలిపిన పసుపు అయితే గుడ్డకు ముదురు రంగు గట్టిగా పట్టుకుంటుంది. అదే ప్రకృతి సిద్ధమైన పసుపు అయితే సాధారణ రంగును ఇస్తుంది, పైగా కాలక్రమేణా ఆ రంగు వెలిసిపోతుంది.
5. వాసన, రుచిని గమనించండిఅసలైన పసుపును వాసన చూస్తే సహజమైన మట్టి సువాసన వస్తుంది. నోట్లో వేసుకుంటే కొద్దిగా ఘాటుగా, చేదుగా అనిపిస్తుంది. అలా కాకుండా రసాయనాల వాసన వచ్చినా, లేదా అస్సలు వాసన లేకపోయినా దానికి దూరంగా ఉండటమే మంచిది.
కల్తీ బారిన పడకుండా ఉండాలంటే..?
పసుపు కొనేటప్పుడు ఎల్లప్పుడూ ప్యాకెట్పై FSSAI (ఫుడ్ సేఫ్టీ) మార్క్, తయారీ తేదీని తప్పకుండా పరిశీలించండి.విశ్వసనీయమైన బ్రాండ్లు లేదా నమ్మకమైన దుకాణాల నుంచే వస్తువులను కొనుగోలు చేయండి.ధర చాలా తక్కువగా ఉందని నాణ్యత లేని వస్తువులను కొని ఆరోగ్యాన్ని పాడుచేసుకోవద్దు.అన్నింటికంటే ఉత్తమమైన మార్గం.. మార్కెట్ నుంచి నేరుగా పసుపు కొమ్ములను తెచ్చుకుని, వాటిని ఎండబెట్టి, ఇంట్లోనే లేదా మిల్లులో ఆడించి పొడి చేసుకోవడం. ఇది వంద శాతం సురక్షితం. పసుపును ఎల్లప్పుడూ తడి తగలకుండా, గాలి చొరబడని డబ్బాలో భద్రపరుచుకోవడం ద్వారా దానిలోని ఔషధ గుణాలు దెబ్బతినకుండా ఉంటాయి.