చిన్నారుల్లో మెరుగవుతున్న ఎదుగుదల.. దేశవ్యాప్తంగా తాజా గణాంకాలు ఇవే..

గణాంకాలు ఏం చెబుతున్నాయి..?

జాతీయ కుటుంబ ఆరోగ్య సర్వే తాజా నివేదిక ప్రకారం.. దేశవ్యాప్తంగా పిల్లల్లో ఎదుగుదల లోపం క్రమంగా తగ్గుముఖం పడుతోంది.

జాతీయ స్థాయిలో..

గత సర్వే (NFHS-5)లో దేశవ్యాప్తంగా 35.5 శాతంగా ఉన్న ఈ సమస్య, తాజా సర్వే (NFHS-6) నాటికి 29.3 శాతానికి తగ్గింది.దేశంలోనే అత్యధిక జనాభా కలిగిన ఉత్తరప్రదేశ్ రాష్ట్రంలో ఈ మార్పు మరింత ఆశాజనకంగా ఉంది. అక్కడ గతంలో 39.7 శాతంగా ఉన్న ఈ సమస్య, ఇప్పుడు 31.5 శాతానికి దిగివచ్చింది. అంటే ఏకంగా 8.2 శాతం మేర మెరుగుదల కనిపించింది.

ఈ సానుకూల మార్పునకు కారణాలు ఇవే..

పిల్లల ఎదుగుదలలో వస్తున్న ఈ మార్పు రాత్రికి రాత్రే వచ్చింది కాదు. దీర్ఘకాలంగా అందిస్తున్న ఆరోగ్య సేవల ఫలితమిది. ముఖ్యంగా ఈ క్రింది అంశాలు ప్రధాన పాత్ర పోషించాయి. గర్భిణులు, బాలింతలు, చిన్నారులకు పౌష్టికాహారం అందుబాటులోకి రావడం. పుట్టినప్పటి నుంచి ఆరు నెలల వరకు కేవలం తల్లిపాలు మాత్రమే ఇవ్వడం, ఆ తర్వాత వయసుకు తగ్గ అనుబంధ ఆహారం (Complementary feeding) సమయానికి ప్రారంభించడం. వయసుల వారీగా పిల్లలకు వేయాల్సిన వ్యాధినిరోధక టీకాలను క్రమం తప్పకుండా వేయించడం వల్ల, వారు తరచూ అనారోగ్యాల బారిన పడకుండా కాపాడుకోగలగడం.

 వైద్య సేవల విస్తరణ..

 క్షేత్రస్థాయిలో ఆశా వర్కర్లు, అంగన్‌వాడీ కేంద్రాల ద్వారా మాతాశిశు సంరక్షణ పట్ల నిరంతర పర్యవేక్షణ పెరగడం. పిల్లల శారీరక, మానసిక వికాసానికి తల్లి గర్భంలో పడిన నాటి నుంచి వారికి రెండేళ్లు వచ్చే వరకు.. అంటే సుమారు తొలి 1000 రోజులు అత్యంత కీలకమని చిన్నపిల్లల వైద్య నిపుణులు స్పష్టం చేస్తున్నారు.

ఈ సమయంలో తల్లికి సరైన పోషణ, క్రమం తప్పని వైద్య పరీక్షలు అందించాలి. బిడ్డ పుట్టిన తర్వాత పరిశుభ్రమైన వాతావరణంలో పెంచడం, సరైన సమయంలో అనుబంధ ఆహారం అందించడం ద్వారా దీర్ఘకాలిక పోషకాహార లోపాన్ని, ఎత్తు తగ్గిపోయే సమస్యను పూర్తిగా అరికట్టవచ్చని వైద్యులు సూచిస్తున్నారు.