తెలంగాణ కొత్త ఉద్యోగుల ఆరోగ్య పథకానికి భారీ స్పందన.. 919 ఆస్పత్రుల్లో క్యాష్‌లెస్ వైద్యం

ఇప్పటివరకు 15,395 చికిత్సలకు అనుమతి

జూలై 17న పథకం ప్రారంభమైనప్పటి నుంచి ఇప్పటివరకు 15,395 చికిత్సలకు ప్రీ-ఆథరైజేషన్ లభించింది. వీటి విలువ సుమారు రూ.104.63 కోట్లు.

పథకంలో 778 ప్రైవేటు, 141 ప్రభుత్వ ఆస్పత్రులు ఎంప్యానెల్ అయ్యాయి. సెప్టెంబరు 1 నుంచి పోలీసు శాఖను కూడా ఈ పథకంలో చేర్చారు.

నెలకు రూ.88 కోట్ల ప్రత్యేక నిధి

NEHS కోసం నెలకు రూ.88 కోట్ల ప్రత్యేక నిధిని ఏర్పాటు చేశారు. ఉద్యోగులు, పెన్షనర్లు తమ బేసిక్ పే లేదా బేసిక్ పెన్షన్‌లో 1.5 శాతం చెల్లిస్తుండగా, ప్రభుత్వం కూడా అంతే మొత్తాన్ని మ్యాచింగ్ కాంట్రిబ్యూషన్‌గా అందిస్తోంది.

ఉద్యోగులు, పెన్షనర్ల నుంచి నెలకు సుమారు రూ.44 కోట్లు సమకూరుతుండగా, ప్రభుత్వం మరో రూ.44 కోట్లు అందిస్తోంది. ఇప్పటికే మూడు నెలలకు సంబంధించిన నిధులను ట్రస్ట్‌కు బదిలీ చేశారు. ఈ పథకానికి వార్షిక బడ్జెట్ సుమారు రూ.1,056 కోట్లుగా అంచనా వేశారు.

OP సేవలు కూడా క్యాష్‌లెస్

NEHS కింద కేవలం ఇన్‌పేషెంట్ చికిత్స మాత్రమే కాకుండా అవుట్‌పేషెంట్ సేవలు కూడా అందుబాటులో ఉన్నాయి. వెల్‌నెస్ సెంటర్లలో వైద్యుల సంప్రదింపులు, డయాగ్నస్టిక్ పరీక్షలు, మందులను క్యాష్‌లెస్‌గా అందిస్తున్నారు.

ప్రస్తుతం 12 జిల్లాల్లో 12 వెల్‌నెస్ సెంటర్లు పనిచేస్తున్నాయి. మరో 25 వెల్‌నెస్ సెంటర్ల ఏర్పాటుకు ప్రతిపాదనలు సిద్ధం చేశారు. వీటిలో 21 జిల్లాల్లో, 4 హైదరాబాద్, మేడ్చల్-మల్కాజిగిరి పరిధిలో ఏర్పాటు చేయనున్నారు. దీంతో మొత్తం వెల్‌నెస్ సెంటర్ల సంఖ్య 37కి చేరనుంది.

1,816 చికిత్సా ప్యాకేజీలు

ఇన్‌పేషెంట్ చికిత్స కోసం 1,816 CGHS ట్రీట్‌మెంట్ ప్యాకేజీలను అమలు చేస్తున్నారు. వీటిలో చికిత్స, మందులు, డయాగ్నస్టిక్ పరీక్షలు, వినియోగ వస్తువులు, ఇంప్లాంట్లు, తదుపరి వైద్య సేవలు కూడా ఉంటాయి.

అత్యవసర పరిస్థితుల్లో ముందస్తు రిఫరల్ లేకుండానే సమీపంలోని ఎంప్యానెల్ ఆస్పత్రిలో చేరి చికిత్స పొందవచ్చని అధికారులు తెలిపారు. అయితే నిర్ణీత సమయంలో అవసరమైన వివరాలను ట్రస్ట్‌కు తెలియజేయాల్సి ఉంటుంది.