వానాకాలంలో పొంచి ఉన్న 'ర్యాట్ ఫీవర్' ముప్పు.. మురుగునీటితో జాగ్రత్త..

భారీ వర్షాలు, రోడ్లపై నిలిచిపోయే వరద నీటి కారణంగా వానాకాలంలో అంటువ్యాధుల ముప్పు పొంచి ఉంటుంది. ఇటీవల ముంబయిలో కురిసిన కుండపోత వర్షాల నేపథ్యంలో బృహన్ముంబయి మున్సిపల్ కార్పొరేషన్ (BMC) 'ర్యాట్ ఫీవర్' అంటే లెప్టోస్పైరోసిస్ పట్ల ప్రజలను అప్రమత్తం చేస్తూ ప్రత్యేక ఆరోగ్య మార్గదర్శకాలను జారీ చేసింది. 'జర్నల్ ఆఫ్ ఇన్ఫెక్షన్' నివేదిక ప్రకారం, ప్రపంచవ్యాప్తంగా ఏటా సుమారు 10 లక్షల మంది ఈ వ్యాధి బారిన పడుతుండగా, దాదాపు 60 వేల మంది ప్రాణాలు కోల్పోతున్నారు. మన దేశంలోనూ వర్షాకాలంలో ఈ కేసులు గణనీయంగా పెరుగుతున్నాయి. ఈ నేపథ్యంలో ర్యాట్ ఫీవర్ అంటే ఏమిటి, ఎలా వ్యాపిస్తుంది, ఎలాంటి జాగ్రత్తలు తీసుకోవాలో జైపూర్‌లోని అపోలో స్పెక్ట్రా ఆసుపత్రి ఇంటర్నల్ మెడిసిన్ కన్సల్టెంట్ డాక్టర్ రోహిత్ శర్మ వివరించారు.

అసలేమిటీ ర్యాట్ ఫీవర్ (లెప్టోస్పైరోసిస్)..?

ఇది 'లెప్టోస్పైరా' (Leptospira) అనే బ్యాక్టీరియా వల్ల కలిగే ఒక తీవ్రమైన ఇన్ఫెక్షన్. సాధారణంగా ఎలుకలు, ఇతర జంతువుల మూత్రం ద్వారా ఈ బ్యాక్టీరియా బయటకు వచ్చి నీరు, మట్టి, బురదను కలుషితం చేస్తుంది. ఆ కలుషిత నీటిలో మనం నడిచినప్పుడు మన చర్మంపై ఉండే చిన్నపాటి గాయాలు, గీతలు లేదా కళ్లు, ముక్కు, నోటి ద్వారా ఈ బ్యాక్టీరియా శరీరంలోకి ప్రవేశిస్తుంది. అయితే, ఒక మనిషి నుంచి మరో మనిషికి సాధారణ స్పర్శ ద్వారా, కలిసి భోజనం చేయడం వల్ల ఈ వ్యాధి సోకడం చాలా అరుదు.

వర్షాకాలంలోనే ప్రమాదం ఎందుకు ఎక్కువ..?

భారీ వర్షాలు కురిసినప్పుడు డ్రైనేజీ నీరు, వర్షపు నీరు, ఎలుకల వ్యర్థాలు అన్నీ కలిసిపోతాయి. ఈ తేమ వాతావరణంలో లెప్టోస్పైరా బ్యాక్టీరియా ఎక్కువ కాలం సజీవంగా ఉంటుంది. మురుగునీటిలో నడవాల్సి వచ్చే వారు, పారిశుద్ధ్య కార్మికులు, రైతులు, నీరు నిలిచిన ప్రాంతాల్లో తిరిగే వారికి ఈ వ్యాధి సోకే ప్రమాదం ఎక్కువగా ఉంటుంది.

సాధారణ జ్వరానికి, ర్యాట్ ఫీవర్‌కు తేడా ఎలా గుర్తించాలి?

ప్రారంభ దశలో దీని లక్షణాలు సాధారణ ఫ్లూ లేదా వైరల్ జ్వరం మాదిరిగానే ఉండటం వల్ల చాలామంది దీనిని తేలికగా తీసుకుంటారు.

ప్రారంభ లక్షణాలు..తీవ్రమైన జ్వరం, విపరీతమైన తలనొప్పి, కండరాల నొప్పులు ముఖ్యంగా పిక్కలు, వీపు భాగంలో, కళ్లు ఎర్రబడటం, చలి, వాంతులు.

 సకాలంలో చికిత్స అందకపోతే 3 నుండి 10 రోజుల్లో వ్యాధి ముదురుతుంది. కొన్నిసార్లు మధ్యలో జ్వరం తగ్గినట్లు అనిపించి మళ్లీ తీవ్రమవుతుంది. ఈ దశలో పచ్చకామెర్లు చర్మం, కళ్లు పసుపు రంగులోకి మారడం, శ్వాస తీసుకోవడంలో ఇబ్బంది, మూత్రం తగ్గిపోవడం లేదా మూత్రంలో రక్తం రావడం, దగ్గుతో పాటు రక్తం పడటం, తీవ్ర నీరసం, అపస్మారక స్థితి వంటి లక్షణాలు కనిపిస్తాయి. ఇవి కనిపిస్తే ఏమాత్రం ఆలస్యం చేయకుండా ఆసుపత్రికి వెళ్లాలి. నిర్లక్ష్యం చేస్తే కిడ్నీలు, కాలేయం, ఊపిరితిత్తులు దెబ్బతినే ప్రమాదం ఉంది.