గాల్లో వందల అడుగుల ఎత్తున గింగిరాలు తిరుగుతూ, వేగంగా దూసుకుపోయే రోలర్ కోస్టర్ (Roller Coaster) ఎక్కడం చాలామందికి థ్రిల్ను ఇస్తుంది. అడ్రినలిన్ రష్ను పెంచే ఈ రైడ్స్ విపరీతమైన ఆనందాన్ని ఇచ్చినప్పటికీ.. వీటివల్ల మెదడులో రక్తస్రావం (Brain Bleeding) జరిగే ప్రమాదం ఉందని తాజా ఘటనలు హెచ్చరిస్తున్నాయి. విపరీతమైన కుదుపులు, వేగంలో వచ్చే ఆకస్మిక మార్పులు మెదడుపై తీవ్ర దుష్ప్రభావం చూపుతున్నాయని నిపుణులు ఆందోళన వ్యక్తం చేస్తున్నారు.
కాలిఫోర్నియాలోని సిక్స్ ఫ్లాగ్స్ మ్యాజిక్ మౌంటైన్ అమ్యూజ్మెంట్ పార్క్లోని 'ఎక్స్2 (X2)' రోలర్ కోస్టర్ కారణంగా గత రెండేళ్లలో వందకు పైగా మెదడు గాయాల కేసులు నమోదైనట్లు సీఎన్ఎన్ (CNN) నివేదించింది. జులైలో కేవలం ఆరు రోజుల వ్యవధిలో ఈ రైడ్ ఎక్కిన ఇద్దరు మహిళలు తీవ్రమైన బ్రెయిన్ హెమరేజ్ బారిన పడ్డారు. ప్రాణాపాయ స్థితిలో ఉన్న వారికి వైద్యులు అత్యవసర శస్త్రచికిత్స చేయాల్సి వచ్చింది. విపరీతమైన వేగం, అకస్మాత్తుగా బ్రేకులు పడటం వల్లే ఇలా జరిగిందని వైద్యులు నిర్ధారించారు. దీంతో ఈ తరహా రైడ్స్ మన శరీరంపై, ముఖ్యంగా మెదడుపై ఎలాంటి ప్రభావం చూపుతాయనే దానిపై వైద్యపరమైన చర్చ మొదలైంది.
తలకు దెబ్బ తగలకపోయినా..
సాధారణంగా మన మెదడు చుట్టూ మస్తిష్క మేరు ద్రవం (Cerebrospinal fluid) ఉంటుంది. ఇది రోజువారీ కదలికలు, చిన్నపాటి కుదుపుల నుంచి మెదడుకు రక్షణ కవచంలా పనిచేస్తుంది. కానీ, దీని సామర్థ్యానికి కూడా కొన్ని పరిమితులు ఉన్నాయి. రోలర్ కోస్టర్ ఒక్కసారిగా వేగం పుంజుకున్నప్పుడు లేదా అకస్మాత్తుగా ఆగినప్పుడు, దిశ మారినప్పుడు మన తల, అందులోని మెదడు ఒకే వేగంతో కదలవు.
ఈ ఆకస్మిక కుదుపుల వల్ల పుర్రె లోపల మెదడు కదలడం, సాగడం లేదా గుండ్రంగా తిరగడం (Rotational movements) జరుగుతుంది. దీనివల్ల రక్తనాళాలు, నరాల కణజాలాలపై తీవ్ర ఒత్తిడి పడి, అవి చిట్లిపోయి మెదడులో రక్తస్రావం జరుగుతుంది. అంటే, తల నేరుగా దేనికో లేదా కఠినమైన ఉపరితలానికో గుద్దుకోకపోయినా, కేవలం ఈ వేగవంతమైన కదలికల వల్లే మెదడుకు తీవ్ర గాయాలవుతాయి.