పురుషులకూ హెచ్‌పీవీ టీకా అవసరమేనా..? వైద్యులు ఏమంటున్నారంటే..?

సాధారణంగా హెచ్‌పీవీ అంటే హ్యూమన్ పాపిలోమా వైరస్.. వ్యాక్సిన్ అంటే కేవలం మహిళలకు, ముఖ్యంగా గర్భాశయ ముఖద్వార క్యాన్సర్ నివారణకు మాత్రమేననే అవగాహన ఉంది. కానీ, మారుతున్న కాలంతో పాటు పెరుగుతున్న క్యాన్సర్ కేసులను గమనిస్తే.. పురుషులు కూడా ఈ టీకా తీసుకోవడం అత్యవసరమని వైద్య నిపుణులు స్పష్టం చేస్తున్నారు. అసలు పురుషులకు ఈ టీకా ఎందుకు అవసరం? దీనివల్ల కలిగే ప్రయోజనాలేమిటో ఇప్పుడు తెలుసుకుందాం. ఏమిటీ హెచ్‌పీవీ..? దీనివల్ల వచ్చే ప్రమాదాలేంటి..?హెచ్‌పీవీ అనేది చర్మం లేదా శారీరక స్పర్శ ద్వారా ఒకరి నుంచి మరొకరికి అత్యంత వేగంగా వ్యాపించే వైరస్. మహిళల్లో ఇది గర్భాశయ ముఖద్వార క్యాన్సర్‌కు ప్రధాన కారణం కాగా, పురుషుల్లోనూ ఇది తీవ్రమైన ఆరోగ్య సమస్యలను కలిగిస్తుంది.

గొంతు క్యాన్సర్.. నోరు, గొంతు భాగాల్లో వచ్చే క్యాన్సర్లకు హెచ్‌పీవీ ఒక ప్రధాన కారణం. పురుషాంగ క్యాన్సర్.. పురుష జననేంద్రియాలకు సంబంధించిన క్యాన్సర్ ముప్పు పెరుగుతుంది.పురుషులు ఎందుకు టీకా తీసుకోవాలి..?ప్రాణాంతక క్యాన్సర్ల నుంచి పురుషులు తమను తాము రక్షించుకోవ డానికి ఈ టీకా ఒక కవచంలా పనిచేస్తుంది. పురుషులు టీకా తీసుకోవడం వల్ల వారి నుంచి మహిళలకు వైరస్ సోకే అవకాశం తగ్గుతుంది. తద్వారా సమాజంలో వైరస్ గొలుసును తెంచవచ్చు. ఈ వ్యాక్సిన్ శరీరంలో శక్తివంతమైన యాంటీబాడీలను ఉత్పత్తి చేస్తుంది, ఇవి భవిష్యత్తులో వైరస్ దాడి చేసినా సమర్థవంతంగా ఎదుర్కొంటాయి. భారతదేశంలో క్యాన్సర్ కేసుల పెరుగుదల దృష్ట్యా, ప్రభుత్వం ఇప్పటికే 14 ఏళ్లు పైబడిన బాలికలకు ఉచితంగా టీకాలు అందించే కార్యక్రమాన్ని చేపట్టింది. అయితే, అంతర్జాతీయ మార్గదర్శకాల ప్రకారం, 9 నుండి 26 ఏళ్ల వయసు లోపు ఉన్న పురుషులు కూడా ఈ టీకా తీసుకోవడం శ్రేయస్కరం. ముఖ్యంగా సంక్రమణ ప్రమాదం ఎక్కువగా ఉన్నవారు వైద్యుల సలహాతో తప్పనిసరిగా టీకా వేయించుకోవాలని ఆరోగ్య నిపుణులు సూచిస్తున్నారు.క్యాన్సర్ వంటి మహమ్మారులను ఎదుర్కోవడంలో 'నివారణే మేలు' హెచ్‌పీవీ టీకా అనేది కేవలం ఒక వర్గానికి సంబంధించింది కాదు.. ఇది ఆరోగ్యవంతమైన సమాజ స్థాపనకు అందరికీ అవసరమైన రక్షణ కవచం. మీ ఫ్యామిలీ డాక్టర్ ని సంప్రదించి, ఈ టీకాపై మరింత అవగాహన పెంచుకోండి.