మంకీపాక్స్ రెండు వేరియంట్ల ప్రభావం దాదాపు ఒకటే.. ఐసీఎంఆర్ తాజా అధ్యయనంలో వెల్లడి..

ప్రపంచవ్యాప్తంగా మంకీపాక్స్ (Mpox) కొత్త వేరియంట్లపై తీవ్ర ఆందోళన వ్యక్తమవుతున్న వేళ, ఇండియన్ కౌన్సిల్ ఆఫ్ మెడికల్ రీసెర్చ్ (ICMR) కు చెందిన భారతీయ శాస్త్రవేత్తలు ఒక కీలక అధ్యయనాన్ని నిర్వహించారు. మంకీపాక్స్‌కు చెందిన రెండు ప్రధాన వేరియంట్లు అయిన 'క్లేడ్-1బీ', 'క్లేడ్-2బీ'లు వ్యాధి లక్షణాలు, శరీరంలో వైరస్ వ్యాప్తిలో దాదాపు ఒకే రకమైన ప్రభావాన్ని చూపుతున్నాయని ఈ పరిశోధనలో స్పష్టమైంది.

కుందేళ్లపై శాస్త్రవేత్తల ప్రయోగాలు..

న్యూజిలాండ్ వైట్ జాతికి చెందిన కుందేళ్లపై శాస్త్రవేత్తలు ఈ అధ్యయనాన్ని చేపట్టారు. ఈ రెండు వేరియంట్లు సోకిన ఐదు రోజుల తర్వాత కుందేళ్ల చర్మంపై ఎర్రటి దద్దుర్లు బయటపడ్డాయి. కాలక్రమేణా ఆ దద్దుర్లు ముదురు ఎరుపు రంగులోకి మారి, పొక్కులుగా ఏర్పడ్డాయి. సుమారు రెండు వారాల తర్వాత ఈ గాయాలు మానడం ప్రారంభమయ్యాయి. రెండు రకాల వైరస్‌లు సోకిన కుందేళ్లలోనూ వ్యాధి లక్షణాలు, తీవ్రతలో పెద్దగా తేడాలేమీ లేవని నిపుణులు గుర్తించారు.

అవయవాల వరకు వైరస్ వ్యాప్తి..

కేవలం చర్మంపైనే కాకుండా శరీరంలోని అంతర్గత భాగాలపై కూడా వైరస్ ప్రభావం ఉన్నట్లు ఈ అధ్యయనంలో తేలింది. ముక్కు, చర్మం, వృషణాల (testicles) కణజాలంలో కూడా వైరస్ ఆనవాళ్లు ఉన్నట్లు పరీక్షల్లో నిర్ధారణ అయింది.బయటకు లక్షణాలు కనిపించకపోయినా..

ఈ ప్రయోగంలో మరో ఆసక్తికరమైన విషయం బయటపడింది. కొన్ని కుందేళ్లలో వ్యాధికి సంబంధించిన బాహ్య లక్షణాలు..దద్దుర్లు లాంటివి స్పష్టంగా కనిపించనప్పటికీ, వాటి నమూనాల్లో వైరస్ జన్యు పదార్థం (Genetic material) ఉన్నట్లు తేలింది. అంటే బయటకు ఎటువంటి లక్షణాలు కనిపించకపోయినా, ప్రాణుల శరీరంలో ఈ వైరస్ ఉండే ప్రమాదం ఉందని ఇది సూచిస్తోంది.

ఈ అధ్యయనం ప్రాముఖ్యత ఏంటి..?

మంకీపాక్స్ అనేది జ్వరం, ఒళ్లు నొప్పులు, శోషరస గ్రంథుల (Lymph nodes) వాపు, చర్మంపై దద్దుర్లు వంటి లక్షణాలతో కూడిన ఒక వైరల్ వ్యాధి. ఐసీఎంఆర్ చేసిన ఈ తాజా జంతు నమూనా (Animal model) అధ్యయనం.. భవిష్యత్తులో ఎంపాక్స్‌కు మరింత సమర్థవంతమైన మందులు కనుగొనడానికి, వ్యాక్సిన్లు, ఇతర నివారణ చర్యల ప్రభావాన్ని అంచనా వేయడానికి ఎంతగానో సహాయపడుతుందని వైద్య నిపుణులు భావిస్తున్నారు.