పిల్లల్లో తల పేల సమస్య సర్వసాధారణం. బడుల్లో, ఆటలాడే ప్రదేశాల్లో ఒకరికొకరు దగ్గరగా ఉండటం వల్ల పేలు చాలా వేగంగా వ్యాపిస్తాయి. అయితే, పరిశుభ్రత లోపించడం వల్లే పేలు పడతాయనుకోవడం కేవలం అపోహ మాత్రమే. ఈ సమస్య ఎవరికైనా రావొచ్చు. పేలు ఎలా వ్యాపిస్తాయి, వాటిని గుర్తించే మార్గాలు, నివారణోపాయాలపై అవగాహన పెంచుకుంటే ఈ సమస్యకు సులభంగా చెక్ పెట్టవచ్చు.
వ్యాప్తికి కారణాలు.. వ్యక్తిగత జాగ్రత్తలు
తల పేలు ఎగరలేవు, దూకలేవు. ఇవి ఒకరి తల మరొకరికి తగిలినప్పుడు లేదా తలకు ఉపయోగించే వస్తువులను పంచుకోవడం ద్వారానే ఎక్కువగా వ్యాపిస్తాయి. ఇంట్లో ఒకరు వాడిన దువ్వెన లేదా హెయిర్ బ్రష్‌ను మరొకరు ఉపయోగించవద్దు. దువ్వెనలు నేరుగా మాడుకు తగులుతాయి కాబట్టి వీటి ద్వారా పేలు, ఈరులు సులభంగా ఇతరులకు వ్యాపిస్తాయి.
హెయిర్ బ్యాండ్లు, రిబ్బన్లు పంచుకోవద్దు: పిల్లలు తమ హెయిర్ బ్యాండ్లు, క్లిప్పులు, రిబ్బన్లను స్నేహితులతో పంచుకుంటూ ఉంటారు. వీటి ద్వారా కూడా పేలు వ్యాపించే ఆస్కారం ఉండటంతో వీటిని పంచుకోకుండా చూడాలి.
టోపీలు, క్యాప్‌లు వ్యక్తిగతంగానే.. తలకు పెట్టుకునే టోపీలు, హెల్మెట్లు, స్కార్ఫ్‌లు నేరుగా మాడును తాకుతాయి. కాబట్టి వీటిని ఎవరివి వారే ఉపయోగించడం అలవాటు చేసుకోవాలి.
లక్షణాలు ఎలా ఉంటాయి..?
తలలో పేలు ఉంటే నిరంతరం తీవ్రమైన దురద వస్తుంది. మాడుపై ఏదో పాకుతున్నట్లు అసౌకర్యంగా అనిపిస్తుంది.వెండ్రుకల కుదుళ్ల వద్ద తెల్లటి లేదా గోధుమ రంగులో ఉండే గుడ్లు అతుక్కుని కనిపిస్తాయి.
పరిష్కార మార్గాలు..
క్రమం తప్పకుండా తనిఖీ.. పిల్లలు తలను పదే పదే గోక్కుంటున్నట్లయితే వెలుతురులో మాడును నిశితంగా పరిశీలించాలి. పేలు లేదా ఈరులు కనిపిస్తే వెంటనే చర్యలు ప్రారంభించాలి.
యాంటీ-లైస్ చికిత్స..పేల సమస్య తీవ్రంగా ఉంటే వైద్యులు లేదా నిపుణుల సలహాతో మెడికేటెడ్ షాంపూలు లేదా లోషన్లు వాడాలి.
సన్నని పళ్ల దువ్వెన..తలస్నానం చేయించిన తర్వాత తడి జుట్టుపై సన్నటి పళ్లు ఉండే ప్రత్యేక పేల దువ్వెనతో దువ్వడం వల్ల పేలు, వాటి గుడ్లు తొలగిపోతాయి.
వస్త్రాల పరిశుభ్రత.. సమస్య తగ్గేంతవరకు తలగడ కవర్లు, బెడ్‌షీట్లు, టోపీలను వేడి నీటితో శుభ్రం చేసి ఎండలో ఆరబెట్టాలి.
తల పేలు పడటం అనేది సిగ్గుపడాల్సిన విషయమేమీ కాదు. సరైన అవగాహన, చిన్నపాటి జాగ్రత్తలు, క్రమం తప్పని పరిశుభ్రతతో ఈ సమస్యను మొదట్లోనే అరికట్టవచ్చు.