వాతావరణం మారగానే ఆగకుండా తుమ్ములు రావడం, ముక్కు కారడం లేదా దిబ్బడ వేయడం చాలామందిలో చూస్తుంటాం. చాలా సందర్భాల్లో దీన్ని సాధారణ జలుబుగానే భావించి సొంత వైద్యంతో మందులు వాడుతుంటారు. అయితే ఇవి కేవలం జలుబు వల్లనే కాకుండా 'అలర్జీ' కారణంగా కూడా రావొచ్చు. జలుబు వైరస్ల వల్ల వస్తే.. దుమ్ము, ధూళి, పెంపుడు జంతువుల వెంట్రుకలు, పుప్పొడి వంటి పదార్థాలు రోగనిరోధక వ్యవస్థను ప్రేరేపించినప్పుడు అలర్జీ తలెత్తుతుంది. ఈ రెండింటి లక్షణాలు పైకి ఒకేలా కనిపించినా, వాటి మధ్య స్పష్టమైన తేడాలున్నాయి. సరైన చికిత్స పొందడానికి ఆ 5 ముఖ్యమైన తేడాలను తెలుసుకోవడం ఎంతో అవసరం.
1. తుమ్ములు వచ్చే తీరు..
అలర్జీ.. దుమ్ము దులిపినప్పుడు, చలిగాలి తగిలినప్పుడు లేదా పెంపుడు జంతువుల వద్దకు వెళ్లిన వెంటనే ఆగకుండా వరుసపెట్టి తుమ్ములు వస్తుంటాయి. వీటితో పాటు ముక్కు లోపల, గొంతులో, కళ్లలో దురద ఎక్కువగా ఉంటుంది.
జలుబు.. జలుబు చేసినప్పుడు తుమ్ములు వస్తాయి కానీ అలర్జీలా వరుసపెట్టి రావు. మధ్యమధ్యలో విరామం ఉంటుంది.
2. ముక్కు నుంచి వచ్చే స్రావాలు..
అలర్జీ..అలర్జీ ఉన్నప్పుడు ముక్కు నుంచి చాలా పలుచగా, స్వచ్ఛమైన నీళ్లలా కారుతుంది. అలర్జీ కారకం పరిసరాల్లో ఉన్నంత కాలం ఈ సమస్య కొనసాగుతూనే ఉంటుంది.
జలుబు..ప్రారంభంలో నీరులా కారినా, రెండు మూడు రోజుల తర్వాత చిక్కటి కఫం లేదా పసుపు-ఆకుపచ్చ రంగు స్రావాలుగా మారుతుంది. ముక్కు ఎక్కువగా దిబ్బడ వేస్తుంది.
3. జ్వరం, ఒళ్లు నొప్పులు..
అలర్జీ.. అలర్జీలో ఎప్పుడూ జ్వరం రాదు. ఒళ్లు నొప్పులు కూడా ఉండవు. అయితే కళ్లు ఎర్రబడటం, కళ్ల నుంచి నీరు కారడం, తీవ్రమైన దురద ప్రధానంగా కనిపిస్తాయి.
జలుబు.. వైరల్ ఇన్ఫెక్షన్ కావడం వల్ల జలుబుతో పాటు స్వల్ప జ్వరం, గొంతునొప్పి, ఒళ్లు నొప్పులు, తీవ్ర అలసట ఉంటాయి.
4. సమస్య మొదలయ్యే పరిస్థితులు..
అలర్జీ..ఇది ఏదైనా ప్రత్యేక వాతావరణం లేదా ప్రదేశానికి వెళ్లిన వెంటనే హఠాత్తుగా మొదలవుతుంది. ఇంటిని శుభ్రం చేస్తున్నప్పుడు, పూల తోటల్లోకి వెళ్లినప్పుడు క్షణాల్లో లక్షణాలు బయటపడతాయి.
జలుబు..ఇది హఠాత్తుగా రాదు. వైరస్ శరీరంలో ప్రవేశించిన తర్వాత నెమ్మదిగా గొంతు గరగరతో మొదలై ఒకటి రెండు రోజుల్లో తీవ్రమవుతుంది.
5. సమస్య ఎంతకాలం ఉంటుంది..?
అలర్జీ.. మీకు పడని పదార్థం తిన్నంత కాలం.. అంటే వారాలు, నెలల తరబడి కూడా ఈ సమస్య తగ్గకుండా వేధిస్తూనే ఉంటుంది.
జలుబు..సాధారణంగా జలుబు వారం నుంచి పది రోజుల్లో దానంతట అదే తగ్గిపోతుంది.
వైద్యుడిని ఎప్పుడు సంప్రదించాలి..?
కింది లక్షణాలు కనిపిస్తే సొంత వైద్యం చేసుకోకుండా నిపుణులను సంప్రదించడం మంచిది. తుమ్ములు, ముక్కు కారడం రెండు వారాలకు మించి తగ్గకపోవడం. ఈ సమస్యల వల్ల రోజువారీ పనులు, రాత్రిపూట నిద్ర తీవ్రంగా ప్రభావితం కావడం. పిల్లికూతలు రావడం లేదా శ్వాస తీసుకోవడంలో ఇబ్బంది కలగడం. ఎక్కువ రోజుల పాటు జ్వరం తగ్గకుండా కొనసాగడం లేదా డీహైడ్రేషన్ లక్షణాలు కనిపించడం.


