శారీరక, మానసిక ఆరోగ్యానికి తగినంత నిద్ర ఎంతో అవసరం. కేవలం ఎనిమిది గంటలు పడుకోవాలనేది సాధారణ నియమం అయినప్పటికీ, వయసును బట్టి నిద్రపోయే సమయం మారు తుంటుంది. నవజాత శిశువులకు 14-17 గంటలు, చిన్న పిల్లలకు 10-13 గంటలు, స్కూల్ వయసు పిల్లలకు 9-12 గంటలు, టీనేజర్లకు 8-10 గంటల నిద్ర అవసరం. ఇక వయోజనులకు రోజుకు 7-9 గంటలు, 65 ఏళ్లు పైబడిన వారికి 7-8 గంటల నిద్ర సరిపోతుందని ఆరోగ్య నిపుణులు సూచిస్తున్నారు. కేవలం నిద్రపోయే సమయం మాత్రమే కాదు, నిద్ర నాణ్యత కూడా ఇక్కడ అత్యంత కీలక పాత్ర పోషిస్తుంది.
తగినంత నిద్ర లేకపోవడం వల్ల..
రోజూ తగినంత నిద్ర లేకపోవడం వల్ల తీవ్రమైన అనారోగ్య సమస్య లు తలెత్తుతాయి. నిద్రలేమి కారణంగా పగటిపూట విపరీతమైన నీరసం, అలసట వేధిస్తాయి. ఏ పనిపైనా కనీస ఏకాగ్రత పెట్టలేకపోవడం, జ్ఞాపకశక్తి మందగించడం, తరచూ చిరాకు పడటం వంటి లక్షణాలు స్పష్టంగా కనిపిస్తాయి. ఉదయం నిద్రలేచిన తర్వాత కూడా ఉత్సాహంగా అనిపించకపోవడం వల్ల రోజువారీ పనుల్లో వేగం తగ్గుతుంది. ఈ నిద్రలేమి సమస్యను దీర్ఘకాలం పాటు నిర్లక్ష్యం చేస్తే.. అది భవిష్యత్తులో తీవ్రమైన శారీరక, మానసిక రుగ్మతలకు దారి తీసే ప్రమాదం ఉంది.
గాఢమైన, ప్రశాంతమైన నిద్ర కోసం రోజువారీ జీవనశైలిలో చిన్నచిన్న మార్పులు చేసుకోవడం తప్పనిసరి. రోజూ ఒకే సమయానికి నిద్రపోవడం, ఒకే సమయానికి నిద్రలేవడం అలవాటు చేసుకోవాలి. నిద్రకు ఉపక్రమించే ముందు మొబైల్ ఫోన్లు, ల్యాప్‌టాప్‌లు, టీవీ స్క్రీన్లకు దూరంగా ఉండాలి. సాయంత్రం తర్వాత టీ, కాఫీలు, కెఫిన్ ఉన్న పానీయాల వాడకం తగ్గించాలి. మీరు పడుకునే గది ప్రశాంతంగా, చీకటిగా, సౌకర్యవంతంగా ఉండేలా చూసుకోవాలి. అలాగే పగటిపూట కనీస వ్యాయామం చేయడం వల్ల రాత్రిపూట త్వరగా నిద్ర పడుతుంది.