అరటిపండు ఏ సమయంలో తింటే మంచిది..? ఉదయం, రాత్రి లేదా వ్యాయామానికి ముందా.?

అరటిపండు.. ఎంతో సులభంగా మన రోజువారీ డైట్‌లో భాగం చేసుకోగల పండు. దీన్ని బ్రేక్‌ఫాస్ట్‌గా లేదా చిరుతిండిగా ఎప్పుడైనా తీసుకోవచ్చు. ఇందులో కార్బోహైడ్రేట్లు, పొటాషియం వంటి పోషకాలు పుష్కలంగా ఉంటాయి. అయితే, అరటిపండు తినడానికి అందరికీ సరిపోయే ఒకే 'సరైన సమయం' అంటూ ఏదీ లేదు. మీ ఆహారపు అలవాట్లు, శారీరక శ్రమను బట్టి ఏ సమయంలో తీసుకుంటే ఎలాంటి ప్రయోజనాలు కలుగుతాయో ఇక్కడ తెలుసుకుందాం..

ఉదయం అల్పాహారంలో..

ఉరుకుల పరుగుల జీవితంలో ఉదయం నిదానంగా కూర్చుని బ్రేక్‌ఫాస్ట్ చేయడానికి సమయం లేనప్పుడు అరటిపండు చక్కటి ప్రత్యామ్నాయం. అయితే కేవలం పండు మాత్రమే కాకుండా.. పాలు, పెరుగు, ఓట్స్ లేదా కొన్ని డ్రై ఫ్రూట్స్ తో కలిపి తీసుకుంటే శరీరానికి సమతుల్యమైన పోషణ అందుతుంది. రోజంతా ఉత్సాహంగా ఉండటానికి ఇది సహాయపడుతుంది.

వ్యాయామానికి ముందు..

మీరు క్రమం తప్పకుండా వ్యాయామం చేసే వారైతే, వర్కౌట్‌కు ముందు అరటిపండు తినడం ఎంతో మేలు చేస్తుంది. ఇందులోని కార్బోహైడ్రేట్లు శరీరానికి తక్షణ శక్తిని అందిస్తాయి. వ్యాయామానికి ముందు కడుపు నిండా తినడం ఇష్టం లేని వారికి లేదా బరువుగా అనిపిస్తుంది అనుకునే వారికి ఇది బెస్ట్ ఆప్షన్.

వ్యాయామం తర్వాత..

వర్కౌట్ పూర్తయిన తర్వాత కూడా అరటిపండును డైట్‌లో చేర్చుకోవచ్చు. దీనిని పాలు లేదా పెరుగు వంటి ప్రోటీన్ ఉన్న ఆహారంతో కలిపి తీసుకోవడం ద్వారా, వ్యాయామం వల్ల అలసిపోయిన కండరాలు త్వరగా కోలుకోవడానికి (రికవరీకి) అవసరమైన పోషకాలు అందుతాయి.

రాత్రి పూట తినొచ్చా..?

రాత్రివేళ అరటిపండు తింటే అందరికీ ఇబ్బంది కలగకపోవచ్చు. అర్ధరాత్రి ఆకలిగా అనిపిస్తే తేలికపాటి స్నాక్‌గా దీన్ని తీసుకోవచ్చు. కానీ, కొందరికి రాత్రి పూట పండ్లు తింటే కడుపు ఉబ్బరం, గ్యాస్ లేదా జీర్ణ సంబంధిత సమస్యలు వస్తాయి. అలాంటి వారు రాత్రిళ్లు అరటిపండుకు దూరంగా ఉండటమే మంచిది.

రోజుకు ఎన్ని పండ్లు తినాలి..?

అరటిపండు ఆరోగ్యానికి ఎంతో మేలు చేస్తుంది కదా అని ఇష్టం వచ్చినట్లు తినకూడదు. మితంగా తినడం చాలా ముఖ్యం. మీ వయసు, శారీరక శ్రమ, మీరు తీసుకునే ఇతర ఆహార పదార్థాలను బట్టి రోజుకు ఒకటి లేదా రెండు పండ్లు తీసుకోవచ్చు. అతిగా తింటే ఏ రకమైన ఆహారమైనా నష్టమే.

ఈ విషయాలు గుర్తుంచుకోండి..

ఎప్పుడూ తాజాగా, బాగా పండిన అరటిపండ్లనే ఎంచుకోండి.

ఉత్త పండు తినడం కంటే పాలు, పెరుగు, ఓట్స్ వంటి వాటితో కలిపి తీసుకోవడం ఉత్తమం. మధుమేహం లేదా ఇతర అనారోగ్య సమస్యలు ఉన్నవారు, వైద్యులు లేదా డైటీషియన్ సలహా మేరకు మాత్రమే అరటిపండును తమ డైట్‌లో చేర్చుకోవాలి.