రాత్రిపూట హాయిగా నిద్రపోతున్న సమయంలో అకస్మాత్తుగా చేతులు లేదా కాళ్లు తిమ్మిరెక్కడం, సూదులు గుచ్చుకున్నట్లుగా అనిపించడం చాలా మందికి అనుభవమే. కొందరికి చీమలు పాకుతున్నట్లుగానో, ఆ భాగంలో స్పర్శ కోల్పోయినట్లుగానో అనిపిస్తుంది. సాధారణంగా నిద్రించే భంగిమ సరిగ్గా లేకపోవడం వల్ల ఇలా జరుగుతుందని చాలామంది దీనిని తేలికగా తీసుకుంటారు. అప్పుడప్పుడు ఇలా జరగడం సహజమే అయినప్పటికీ, ఈ సమస్య తరచూ వేధిస్తుంటే మాత్రం అంతర్గత ఆరోగ్య సమస్యలకు సంకేతం కావచ్చని వైద్య నిపుణులు హెచ్చరిస్తున్నారు. వైద్య పరిభాషలో ఈ పరిస్థితిని ‘పారెస్తీషియా’ (Paresthesia) అంటారు. నిద్రలో తిమ్మిర్లు రావడానికి గల ప్రధాన కారణాలు, తీసుకోవాల్సిన జాగ్రత్తలు ఏమిటో చూద్దాం..
తిమ్మిర్లకు ప్రధాన కారణాలు
1. నిద్రించే భంగిమ..
చేతిని తల కింద పెట్టుకుని పడుకోవడం లేదా గంటల తరబడి ఒకే వైపుకు తిరిగి నిద్రించడం వల్ల నరాలపై ఒత్తిడి పడుతుంది. దీనివల్ల తాత్కాలికంగా రక్తప్రసరణకు ఆటంకం కలిగి తిమ్మిర్లు వస్తాయి. పక్కకు తిరిగి పడుకున్న కొద్దిసేపటికే ఈ అసౌకర్యం తగ్గిపోతుంది.
2. విటమిన్ బి12 లోపం..
నరాల ఆరోగ్యానికి విటమిన్ బి12 అత్యంత కీలకం. శరీరంలో దీని లోపం తలెత్తితే కాళ్లు, చేతుల్లో తిమ్మిర్లు, బలహీనత, నడిచేటప్పుడు బ్యాలెన్స్ తప్పడం వంటి సమస్యలు కనిపిస్తాయి. దీనిని సకాలంలో గుర్తించకపోతే నరాలు దెబ్బతినే ప్రమాదం ఉంది.
3. మధుమేహం (Diabetes)..
దీర్ఘకాలంగా రక్తంలో చక్కెర స్థాయిలు అదుపులో లేకపోతే నరాలు దెబ్బతింటాయి. దీనినే ‘డయాబెటిక్ న్యూరోపతి’ అంటారు. దీనివల్ల ముఖ్యంగా రాత్రివేళల్లో పాదాల్లో మంటలు, తిమ్మిర్లు, నొప్పి ఎక్కువగా ఉంటాయి. క్రమంగా పాదాల్లో స్పర్శ తగ్గిపోతుంది.
4. మెడ, వెన్నెముక సమస్యలు..
మెడ భాగంలోని నరాలపై ఒత్తిడి పడితే చేతుల్లో, నడుము భాగంలోని నరాలపై ఒత్తిడి పడితే కాళ్లలో తిమ్మిర్లు వస్తాయి. తిమ్మిర్లతో పాటు మెడ, భుజాలు లేదా నడుము నొప్పి వేధిస్తుంటే వెంటనే వైద్యులను సంప్రదించడం ఉత్తమం.
5. రక్తప్రసరణలో లోపాలు..
శరీరంలోని ఏదైనా భాగానికి రక్తప్రసరణ సరిగ్గా అందకపోయినా అక్కడ చల్లగా అనిపించడం, తిమ్మిరెక్కడం జరుగుతుంది. అయితే, తరచూ తిమ్మిర్లు రావడానికి కేవలం రక్తప్రసరణ మాత్రమే కాకుండా నరాల బలహీనత కూడా కారణం కావచ్చు.
ఈ లక్షణాలను అస్సలు నిర్లక్ష్యం చేయొద్దు..
తిమ్మిర్ల సమస్య తరచూ వేధిస్తూ, కింది లక్షణాలు కనిపిస్తే వైద్య పరీక్షలు చేయించుకోవడం తప్పనిసరి:
వేళ్లలో తరచూ జలదరింపు లేదా సూదులు గుచ్చుకున్నట్లు అనిపించడం. చేతులు తిమ్మిరెక్కడం వల్ల రాత్రిపూట నిద్రకు ఆటంకం కలగడం. పాదాల్లో తీవ్రమైన మంటలు రావడం.
చేతులతో వస్తువులను గట్టిగా పట్టుకోలేకపోవడం.నడిచేటప్పుడు తూలిపోతున్నట్లు అనిపించడం.తిమ్మిర్లతో పాటు కండరాల బలహీనత కనిపించడం.
శరీరంలో ఒకవైపు మాత్రమే అకస్మాత్తుగా చెయ్యి, కాలు తిమ్మిరెక్కినా లేదా బలహీనంగా మారినా దానిని ఏమాత్రం ఆలస్యం చేయకూడదు. వీటితో పాటు ముఖం ఒకవైపునకు వంకరపోవడం, మాట తడబడటం, చూపు మసకబారడం వంటి లక్షణాలు కనిపిస్తే అది పక్షవాతం స్ట్రోక్ సంకేతం కావచ్చు. ఇలాంటి పరిస్థితుల్లో లక్షణాలు తగ్గుతాయేమోనని వేచి చూడకుండా తక్షణమే అత్యవసర వైద్య సహాయం పొందాలి.


