ఆధునిక కార్పొరేట్ ఉద్యోగ జీవనశైలిలో ఎయిర్ కండిషన్డ్ (ఏసీ) గదుల్లో గంటల తరబడి కూర్చోవడం, మధ్యమధ్యలో అలసట, ఒత్తిడి దూరం చేసుకోవడానికి వేడివేడిగా టీ, కాఫీలు తాగడం నిత్యకృత్యంగా మారింది. చాలా మంది ఉద్యోగులు నిద్రమత్తు వదిలించుకోవడానికి రోజుకు నాలుగైదు సార్లు కెఫీన్ ఆశ్రయిస్తున్నారు. అయితే, ఏసీ వాతావరణంలో కూర్చుని నిరంతరం టీ, కాఫీలు సేవించడం వల్ల శరీర అంతర్గత సమతుల్యత తీవ్రంగా దెబ్బతింటుందని ఆరోగ్య నిపుణులు హెచ్చరిస్తున్నారు.
మొదట్లో సాధారణంగానే అనిపించే ఈ అలవాటు.. చల్లని వాతావరణం, వేడి పానీయాల కలయిక వల్ల శరీర రక్షణ వ్యవస్థపై ఎలాంటి ప్రతికూల ప్రభావం చూపుతుందో వైద్యులు వివరిస్తున్నారు.
జీర్ణవ్యవస్థ అతలాకుతలం..
చల్లని ఏసీ వాతావరణంలో కూర్చుని పదేపదే వేడివేడి టీ లేదా కాఫీ తాగడం వల్ల కడుపులోని ఉష్ణోగ్రత ఒక్కసారిగా మారిపోతుంది. దీనివల్ల జీర్ణాశయంలోని ఆమ్లాల సమతుల్యత దెబ్బతింటుంది. ముఖ్యంగా ఖాళీ కడుపుతో వీటిని ఎక్కువగా తీసుకోవడం వల్ల తీవ్రమైన గ్యాస్, గుండెల్లో మంట, అజీర్ణం వంటి సమస్యలు తలెత్తుతాయి. దీర్ఘకాలంలో ఈ అలవాటు జీర్ణశక్తిని పూర్తిగా బలహీనపరిచి, ఆకలిని కూడా మందగింపజేస్తుంది.
డీహైడ్రేషన్ ముప్పు..!
సాధారణంగానే ఏసీ గదుల్లో ఎక్కువ సమయం గడపడం వల్ల శరీరంలోని తేమ ఆవిరైపోయి చర్మం పొడిబారుతుంది. దీనికి తోడు టీ, కాఫీల్లో ఉండే కెఫీన్ శరీరంలోని నీటి శాతాన్ని మరింత తగ్గిస్తుంది దీని కారణంగా డీహైడ్రేషన్ సమస్య తలెత్తవచ్చు. ఫలితంగా తరచూ తలనొప్పి రావడం, విపరీతమైన నీరసం, చర్మం జీవం కోల్పోవడం వంటి సమస్యలు చుట్టుముడతాయి.
నిద్రకు దూరం.. పెరిగే ఆందోళన..
ఏసీ గదుల్లో శారీరక శ్రమ లేదా కదలికలు తక్కువగా ఉంటాయి. ఇలాంటి స్థితిలో అధికంగా కెఫీన్ తీసుకోవడం వల్ల అది మెదడును రాత్రి వేళల్లోనూ అనవసరంగా చురుగ్గా ఉంచుతుంది. దీంతో సహజసిద్ధమైన నిద్ర వ్యూహం దెబ్బతిని ‘ఇన్సోమ్నియా’ అంటే నిద్రలేమికి దారితీస్తుంది. రాత్రి సరిగ్గా నిద్ర లేకపోవడం వల్ల మరుసటి రోజు ఆఫీసులో మరింత అలసట, చంచలత్వం పెరుగుతాయి.
గుండెపై అదనపు భారం.. ‘కెఫీన్ క్రాష్..
కదలకుండా ఒకేచోట కూర్చోవడం, దానికి తోడు నిరంతరం కెఫీన్ శరీరంలోకి చేరడం వల్ల గుండె వేగం అంటే పల్స్ రేట్ అసాధారణంగా పెరుగుతుందని వైద్యులు చెబుతున్నారు.
తాత్కాలిక ఉత్సాహం.. ఆ తర్వాత నీరసం..!
ఒత్తిడి సమయంలో టీ, కాఫీలు తాగినప్పుడు అందులోని కెఫీన్ వల్ల తాత్కాలికంగా కొంత శక్తి వచ్చినట్లు అనిపిస్తుంది. అయితే ఆ ప్రభావం తగ్గిన వెంటనే శరీరంలో ‘కెఫీన్ క్రాష్’ (Caffeine Crash) ఏర్పడుతుంది. దీనివల్ల ఏకాగ్రత లోపించడం, విపరీతమైన చిరాకు, మానసిక అలసట ఎక్కువవుతాయని వైద్యనిపుణులు చెబుతున్నారు.
జాగ్రత్తలు అవసరం..
ఆఫీసుల్లో పని ఒత్తిడిని జయించడానికి కేవలం టీ, కాఫీలపైనే ఆధారపడకుండా.. వాటి స్థానంలో తగినంత మంచినీరు, గ్రీన్ టీ లేదా మజ్జిగ వంటివి తీసుకోవడం అలవాటు చేసుకోవాలని నిపుణులు సూచిస్తున్నారు. అలాగే గంటకు ఒకసారి సీటులో నుంచి లేచి కాసేపు అటుఇటు నడవడం వల్ల శరీర ఉష్ణోగ్రత, రక్తప్రసరణ సజావుగా సాగుతాయి.