నేటి ఉరుకుల పరుగుల జీవితంలో కడుపు నొప్పి, గ్యాస్, అజీర్ణం, ఎసిడిటీ మరియు మలబద్ధకం వంటి సమస్యలు సర్వసాధారణంగా మారిపోయాయి. అయితే, ఈ జీర్ణ సంబంధిత సమస్యలపై సమాజంలో ఎన్నో అపోహలు ప్రచారంలో ఉన్నాయి. చాలా మంది వీటిని నిజమని నమ్మి సొంత వైద్యాలు చేసుకుంటూ, అసలైన ఆరోగ్య సమస్యను మరింత తీవ్రం చేసుకుంటున్నారు. ఈ నేపథ్యంలో, ప్రతి ఒక్కరూ తెలుసుకోవాల్సిన 5 ప్రధాన అపోహలు, వాటి వెనుక ఉన్న శాస్త్రీయ నిజాలు ఇక్కడ చూద్దాం..
అపోహ 1: మసాలా దినుసులన్నీ కడుపుకు హానికరం!
నిజం: ఇది పూర్తిగా తప్పు. అధికంగా నూనె, కారం దట్టించిన మసాలా ఆహారాలు ఎసిడిటీ, గుండెల్లో మంటకు దారితీస్తాయి కానీ.. పరిమితంగా వాడే మసాలా దినుసులు జీర్ణక్రియకు ఎంతో మేలు చేస్తాయి. మన వంటింట్లో దొరికే పసుపు, జీలకర్ర, ధనియాలు, అల్లం మరియు వెల్లుల్లి వంటివి జీర్ణ ఎంజైమ్లను ఉత్తేజపరుస్తాయి. ఇవి ఆహారం త్వరగా, సులువుగా జీర్ణం కావడానికి సహాయపడతాయి. కాబట్టి మితంగా వాడితే మసాలాలు ఆరోగ్యానికి రక్షణ కవచాలే.
అపోహ 2: పాలు తాగితే కచ్చితంగా గ్యాస్ వస్తుంది!
నిజం: పాలు కాల్షియం, ప్రోటీన్లు, విటమిన్లు ఉన్న సంపూర్ణ ఆహారం. పాలు తాగిన ప్రతి ఒక్కరికీ గ్యాస్ రాదు. అయితే, కొంతమందిలో 'లాక్టోస్ అసహనం' (Lactose Intolerance) అనే సమస్య ఉంటుంది. వీరి శరీరం పాలలో ఉండే లాక్టోస్ అనే చక్కెరను అరిగించుకోలేదు. అటువంటి వారికి మాత్రమే పాలు తాగినప్పుడు గ్యాస్, కడుపు ఉబ్బరం లేదా విరేచనాలు అవుతాయి. మిగతా వారికి పాలు ఎముకల పుష్టికి, శక్తికి అద్భుతమైన పానీయం.
అపోహ 3: రోజుకు ఒక్కసారైనా మలవిసర్జన కాకపోతే అది జబ్బే..!
నిపుణుల మాట: ప్రతి ఒక్కరి శారీరక తత్వం, జీర్ణవ్యవస్థ భిన్నంగా ఉంటాయి. కొందరికి రోజుకు ఒకసారి మలవిసర్జన కావడం సాధారణం అయితే, మరికొందరికి రెండు రోజులకు ఒకసారి కావడం సాధారణం కావచ్చు. కేవలం రోజువారీ అలవాటు మారినంత మాత్రాన అది వ్యాధి కాదు. అయితే, తీవ్రమైన మలబద్ధకం, విపరీతమైన కడుపు నొప్పి, కడుపు భారంగా ఉండటం వంటి లక్షణాలు ఉంటే మాత్రం నిర్లక్ష్యం చేయకుండా పీచు పదార్థాలు (Fiber) ఎక్కువగా ఉండే ఆహారం తీసుకోవాలి.
అపోహ 4: ఎసిడిటీ రాగానే యాంటాసిడ్ బిళ్లలు వేసుకోవడం సురక్షితం..!
నిజం: కడుపులో మంటగా అనిపించగానే చాలా మంది డాక్టర్ ప్రిస్క్రిప్షన్ లేకుండానే యాంటాసిడ్ మందులు వాడుతుంటారు. ఇవి తాత్కాలిక ఉపశమనాన్ని ఇస్తాయి కానీ, వీటిని తరచూ వాడటం ఏమాత్రం మంచిది కాదు. నిరంతరాయంగా యాంటాసిడ్లు వాడటం వల్ల శరీరంలో మెగ్నీషియం, కాల్షియం సమతుల్యత దెబ్బతింటుంది. ఎసిడిటీ పదే పదే వేధిస్తుంటే, టాబ్లెట్లతో కాలక్షేపం చేయకుండా వైద్యులను సంప్రదించి అసలు కారణాన్ని తెలుసుకోవాలి.
అపోహ 5: భోజనం చేసిన వెంటనే అస్సలు నీరు తాగకూడదు..!
నిజం: తిన్న వెంటనే కొద్ది మొత్తంలో నీరు తాగడం వల్ల ఎటువంటి నష్టం లేదు, అది జీర్ణక్రియకు అడ్డుపడదు. అయితే, భోజనం ముగించిన వెంటనే లీటర్ల కొద్దీ నీరు తాగడం మంచిది కాదు. అలా చేయడం వల్ల కడుపులోని జీర్ణరసాలు (Digestive Juices) పలచబడి, ఆహారం అరిగే ప్రక్రియ మందగిస్తుంది. కాబట్టి తిన్న వెంటనే నాలుగైదు గుటకల నీరు తాగి, ఒక అరగంట ఆగిన తర్వాత తగినన్ని నీరు తాగడం ఉత్తమమైన పద్ధతి.జీర్ణక్రియ సజావుగా సాగాలంటే..పీచు పదార్థాలు (ఫైబర్) ఎక్కువగా ఉండే పండ్లు, ఆకుకూరలు తినాలి. రోజుకు కనీసం 3-4 లీటర్ల నీరు తప్పనిసరిగా తాగాలి. వేళకు భోజనం చేయడం, రాత్రిపూట తేలికపాటి ఆహారం తీసుకోవడం అలవాటు చేసుకోవాలి.
కడుపు ఆరోగ్యంగా ఉంటేనే రోగనిరోధక శక్తి మెరుగ్గా ఉంటుంది. కాబట్టి, ప్రచారంలో ఉండే అపోహలను నమ్మి పొరపాట్లు చేయకుండా.. ఆరోగ్యకరమైన ఆహార నియమాలు పాటిస్తూ జీర్ణవ్యవస్థను కాపాడుకుందాం!