వైద్యుడి సలహా లేకుండా కాల్షియం టాబ్లెట్లు వాడుతున్నారా? అయితే ఈ విషయాలు తెలుసుకోవాల్సిందే..!

సహజంగా లభించే కాల్షియం సరిపోదా..?

మన శరీరంలో ఎముకలు, దంతాల పటిష్టతకు, కండరాల కదలికలకు, నాడీ వ్యవస్థ సజావుగా పనిచేయడానికి కాల్షియం అత్యంత అవసరం. అయితే, సమతుల్య ఆహారం తీసుకునే వారికి సప్లిమెంట్ల అవసరం పెద్దగా ఉండదని నిపుణులు చెబుతున్నారు.

ఆహార వనరులు..పాలు, పెరుగు, చీజ్, ఆకుకూరలు, బాదం, రాగులు వంటి పదార్థాలను రోజూ డైట్‌లో చేర్చుకుంటే శరీరానికి కావలసిన కాల్షియం సహజంగానే అందుతుంది.

సొంత వైద్యంతో వచ్చే ముప్పు..

శరీరంలో కాల్షియం లోపం లేకపోయినా, అవసరానికి మించి అదనపు టాబ్లెట్లు తీసుకోవడం వల్ల పలు ఆరోగ్య సమస్యలు తలెత్తే ప్రమాదం ఉంది.

కిడ్నీలో రాళ్లు.. రక్తంలో కాల్షియం మోతాదు మితిమీరితే (హైపర్‌కాల్సెమియా), అది మూత్రపిండాలపై ప్రభావం చూపి కిడ్నీలో రాళ్లు ఏర్పడటానికి కారణమవుతుంది.

జీర్ణక్రియ సమస్యలు.. పరిమితికి మించి కాల్షియం తీసుకోవడం వల్ల మలబద్ధకం, కడుపు ఉబ్బరం, వాంతులు లేదా వికారం వంటి సమస్యలు వస్తాయి.

ఇతర ఖనిజాల లోపం.. శరీరంలో కాల్షియం స్థాయిలు బాగా పెరిగినప్పుడు, అది ఐరన్, జింక్ వంటి ఇతర ముఖ్యమైన ఖనిజాలను శరీరం గ్రహించకుండా అడ్డుకుంటుంది. దీనివల్ల రక్తహీనత వంటి ఇతర లోపాలు రావచ్చు. కొన్ని సందర్భాల్లో అధిక కాల్షియం రక్తనాళాల్లో చేరి, గుండె కొట్టుకునే వేగంలో హెచ్చుతగ్గులకు దారితీసే అవకాశం ఉందని పరిశోధనలు చెబుతున్నాయి.

సప్లిమెంట్లు ఎవరికి అవసరం..?

కాల్షియం సప్లిమెంట్లను ప్రతి ఒక్కరూ వేసుకోవాల్సిన అవసరం లేదు. కేవలం కొన్ని ప్రత్యేక పరిస్థితుల్లో మాత్రమే వైద్యులు వీటిని సిఫార్సు చేస్తారు.

గర్భధారణ, పాలిచ్చే తల్లులకు

మెనోపాజ్ దశకు చేరుకున్న మహిళలకు

వృద్ధాప్యం కారణంగా ఎముకలు బలహీనపడిన వారికి ,ఆస్టియోపొరోసిస్ ఉన్నవారికి,

వైద్య పరీక్షల్లో కాల్షియం లోపం ఉన్నట్లు స్పష్టంగా తేలిన వారికి

 మీ వయస్సు, బరువు, శారీరక స్థితిని బట్టి మీకు ఎంత మోతాదులో కాల్షియం అవసరమనేది వైద్యులు మాత్రమే నిర్ణయించగలరు. కాబట్టి సొంతంగా మెడికల్ షాపులకు వెళ్లి టాబ్లెట్లు కొనే అలవాటును మానుకోండి. ఏదైనా సప్లిమెంట్ వాడే ముందు డాక్టర్‌ను సంప్రదించి, అవసరమైన పరీక్షలు చేయించుకోవడం ఉత్తమం.