ఈ మధ్య కాలంలో సిక్స్ ప్యాక్ బాడీ, ఫిట్నెస్ కోసం యువత ఎక్కువగా జిమ్ల బాట పడుతోంది. బరువు తగ్గాలన్నా, కండరాలు పెంచాలన్నా ఆహారంలో ప్రోటీన్ అంటే మాంసకృత్తులు ఎక్కువగా ఉండాలనేది జగమెరిగిన సత్యం. అయితే, ఏ పోషకమైనా పరిమితికి లోబడి ఉన్నంత వరకే శరీరానికి మేలు చేస్తుంది. అవసరానికి మించి విపరీతంగా ప్రోటీన్ ఆహారాన్ని లేదా సప్లిమెంట్లను తీసుకోవడం వల్ల శరీరంపై, ముఖ్యంగా రక్తాన్ని శుద్ధి చేసే కిడ్నీలపై తీవ్రమైన అదనపు ఒత్తిడి పడుతుందని ఆరోగ్య నిపుణులు గట్టిగా హెచ్చరిస్తున్నారు. మన శరీరంలోని వ్యర్థాలను, విషపదార్థాలను రక్తం నుంచి వడపోసి మూత్రం ద్వారా బయటకు పంపడం మూత్రపిండాల ముఖ్య విధి.
వడపోత ప్రక్రియకు ఆటంకం..
ఎక్కువ కాలం పాటు మితిమీరిన మోతాదులో ప్రోటీన్ తీసుకోవడం వల్ల, ఆ వ్యర్థాలను విచ్ఛిన్నం చేసి బయటకు పంపడానికి కిడ్నీలు మునుపటి కంటే చాలా కష్టపడాల్సి వస్తుంది. ఇది కిడ్నీల వడపోత సామర్థ్యాన్ని దెబ్బతీస్తుంది.
క్రియేటినిన్, యూరియా పెరుగుదల..
ప్రోటీన్ ఎక్కువైతే రక్తంలో క్రియేటినిన్, యూరియా స్థాయిలు అకస్మాత్తుగా పెరుగుతాయి. ఇవి పెరిగాయంటే కిడ్నీల పనితీరు మందగించిందని అర్థం. ముఖ్యంగా జంతువుల ద్వారా లభించే ప్రోటీన్లను అధికంగా తీసుకోవడం, దానికి తగినట్లుగా నీళ్లు తాగకపోవడం వల్ల శరీరంలో కాల్షియం, యూరిక్ యాసిడ్ పేరుకుపోయి మూత్రపిండాలలో రాళ్లు ఏర్పడే ప్రమాదం గణనీయంగా పెరుగుతుంది.
ఎవరికి ఎక్కువ ముప్పు..?
ఇప్పటికే కిడ్నీ సంబంధిత సమస్యలు, మధుమేహం, లేదా అధిక రక్తపోటు (బీపీ) ఉన్నవారు అధిక ప్రోటీన్ జోలికి వెళ్తే.. ఆ అదనపు ఒత్తిడి వల్ల కిడ్నీలు త్వరగా ఫెయిల్ అయ్యే అవకాశం ఉంది.ఒకరికి రోజుకు ఎంత ప్రోటీన్ అవసరం..? సాధారణ ఆరోగ్యంతో ఉన్న ఒక వయోజన వ్యక్తికి, వారి శరీర బరువులోని ప్రతి కిలోగ్రాముకు రోజుకు సుమారు 0.8 గ్రాముల ప్రోటీన్ సరిపోతుందని వైద్యులు సూచిస్తున్నారు. ఉదాహరణకు ఒక వ్యక్తి బరువు 60 కిలోలు ఉంటే, వారికి రోజుకు సుమారు 48 గ్రాముల ప్రోటీన్ సరిపోతుంది. అయితే, ఈ మోతాదు అనేది వ్యక్తి వయసు, చేసే శారీరక శ్రమ, క్రీడాకారులు లేదా కఠినమైన వ్యాయామాలు చేసే విధానాన్ని బట్టి మారుతుంది. జిమ్లో భారీ కసరత్తులు చేసే వారికి కొద్దిగా ఎక్కువ ప్రోటీన్ అవసరమైనప్పటికీ, అది నిపుణుల పర్యవేక్షణలోనే జరగాలి.
మూత్రపిండాలను కాపాడుకునే సూత్రాలు..
సమతుల్య ఆహారం.. కేవలం ప్రోటీన్ల మీదే శ్రద్ధ పెట్టకుండా అన్ని పోషకాలు ఉండే సమతుల్య ఆహారాన్ని అలవాటు చేసుకోవాలి. తగినంత నీరు..రోజంతా శరీరం డీహైడ్రేషన్కు గురికాకుండా తగినన్ని నీళ్లు తాగుతుండాలి.ఉప్పు, జంక్ ఫుడ్కు దూరం..ఉప్పు ఎక్కువగా ఉండే పదార్థాలు, అతిగా ప్రాసెస్ చేసిన జంక్ ఫుడ్స్కు దూరంగా ఉండాలి.
సొంత వైద్యం వద్దు..చిన్న నొప్పి రాగానే వైద్యుల సలహా లేకుండా పెయిన్ కిల్లర్స్ (నొప్పి నివారణ మాత్రలు) లేదా రకరకాల ఫిట్నెస్ సప్లిమెంట్లను వాడటం కిడ్నీలకు అత్యంత ప్రమాదకరం.వ్యాధుల నియంత్రణ: బీపీ, షుగర్ ఉన్నవారు వాటిని ఎల్లప్పుడూ అదుపులో ఉంచుకోవాలి. క్రమం తప్పకుండా వ్యాయామం చేస్తూ, ధూమపానం, మద్యపానానికి దూరంగా ఉండాలి. ఫిట్నెస్ అనేది కేవలం బాహ్య రూపానికి సంబంధించింది కాదు.. అంతర్గత అవయవాల ఆరోగ్యమే అసలైన ఫిట్నెస్. కాబట్టి ప్రొటీన్ల వినియోగంలో అప్రమత్తంగా ఉంటూ, మీ మూత్రపిండాలను పదిలంగా ఉంచుకోండి..!